СОГТУУРАХ, МАНСУУРАХ ДОНТОЙ ӨВЧТӨНГ АЛБАДАН ЭМЧЛЭХ,
АЛБАДАН ХӨДӨЛМӨР ХИЙЛГЭХ ГАЗРЫН ҮЙЛ АЖИЛЛАГААНЫ ТАЛААР
Тус газар нь Монгол улсын Засгийн газрын 2000 оны 09 дүгээр сарын 27-ны өдрийн 148 дугаар тогтоолоор Нийслэлийн эрүүл мэндийн газрын харьяанаас Шүүхийн шийдвэр гүйцэтгэх ерөнхий газрын харьяанд шилжин, “Согтуурах мансуурах донтой өвчтөнг албадан эмчлэх, албадан хөдөлмөр хийлгэх газар” болж зохион байгуулагдсан ба 2003 онд Төрийн өмчийн хорооны шийдвэрээр Төв аймгийн Баян сум дахь Хөдөлмөр, эмчилгээ, асрамжийн газрын байранд шилжин үйл ажиллагаагаа явуулж байгаа болно.
Тус газар нь жилд дунджаар 400-600 гаруй өвчтөнг Иргэний хэргийн шүүхийн шийдвэрийн дагуу хүлээн авч, стандартын дагуу өвчний түүх нээж, үндсэн ба дагалдах өвчний оношийг тогтоон, 2-6 сарын хугацаагаар албадан эмчилгээнд хамруулдаг.
Эмчилгээ, үйлчилгээний талаар:
Согтуурах мансуурах донтой өвчтөнг албадан эмчлэх, албадан хөдөлмөр хийлгэх газар нь:
-Хордлого тайлах;
-Архины дур дарах;
-Архи зохисгүй болгох;
-Сэтгэл зүйн засал гэсэн үндсэн 4 төрлийн эмчилгээг хийж байна.
Нийгмийн ажилтан, сэтгэл зүйчдийн зүгээс өвчтнүүдэд сэтгэл зүйн зөвлөгөө өгөх, бүлгийн ярилцлага хийх, эрүүл мэндийн боловсрол олгох сургалт зохион байгуулах, соёл олон нийтийн ажил, арга хэмжээнд оролцуулах, лекц мэдээлэл, яриа таниулга хийх зэрэг ажлуудыг тус тус явуулж байгаа болно.
Архины асуудлаа шийдвэрлэж чадсан буюу архинаас нэг мөр гарсан хүмүүсийн өөрийгөө өөрчилсөн туршлага, аддиктологийн эмч, сэтгэлзүйч мэргэжилтнүүдийн зөвлөгөө зэргийг үндэслэн “Сэтгэл зүй, оюун санааны хөгжлийн 9 дэвшилтэд хөтөлбөр”-ийг боловсруулж сэтгэл заслын сургалтандаа тогтмол хэрэглэж байна.
Дэвшилтэд 9 хөтөлбөр нь:
Нэг дүгээр дэвшил -ЭРГЭЛТ БУЦАЛТГҮЙ ШИЙДВЭР
Хоёр дугаар дэвшил-ӨӨРИЙГӨӨ ХАЙРЛАХ ХАМГААЛАХ
Гурав дугаар дэвшил- ТУСАРХАГ ХҮЧ – ИТГЭЛ БИШРЭЛ
Дөрөв дүгээр дэвшил -ҮНЭТ ЗҮЙЛ – ОЮУНЫ СЭРЭЛ
Тав дугаар дэвшил- ХАМТЫН ОЮУН САНАА – ШИНЭ ЭРЧ ХҮЧ
Зургаа дугаар дэвшил -ХЭТИЙН ЗОРИЛГО – ЗӨВ ЗАМ, ХӨГЖИЛ
Долоо дугаар дэвшил – ГЭГЭЭЛЭГ ЧАНАР – УХААРАЛ, БҮТЭЭМЖ
Найм дугаар дэвшил -АМЬД ОРШИХУЙН ҮНЭ ЦЭНЭ – АЛДААГАА ЗАСАХ
Ес дүгээр дэвшил -ЭДГЭРЭЛ ӨӨРЧЛӨЛТ, НӨХӨРЛӨЛ
Дээрх үе шаттайгаар, нийт эмчлүүлэгсдийг 6 бүлэгт хуваан сургалтыг явуулж байна.