Монгол Улсын Засгийн газар “Бүх нийтийн эрх зүйн боловсролыг дээшлүүлэх үндэсний хөтөлбөр”-ийг 2018 оны 50 дугаар тогтоолоор батлан хэрэгжүүлж байгаа билээ.
Үндэсний хөтөлбөрийн хүрээнд иргэдэд зориулсан хууль, эрх зүйн зөвлөгөө мэдээлэл, сургалт, сурталчилгааны баталгаатай эх сурвалж болох эрх зүйн цахим мэдээллийн сан www.e-khutuch.mn цахим хуудсыг шинээр бий болгон 2019 оны 07 дугаар сарын 05-ны өдөр Хэнтий аймагт нээлтийн үйл ажиллагааг зохион байгууллаа.
Уг цахим хуудас нь эрх зүйн хөтчийн мэдээллийн булан байдлаар аймгийн Нэг цэгийн үйлчилгээний төвийн өөртөө туслах танхимд байрлаж байгаа бөгөөд тус аймагт анх удаа жишиг байдлаар хийсэн байна.
“www.e-khutuch.mn” цахим хуудсыг ашиглаж эхэлснээр иргэд хаана амьдарч байгаагаас үл хамааран эрх зүйн үйлчилгээ, мэдээллийг саадгүй авах, эрх, эрх чөлөө, хууль ёсны ашиг сонирхлоо хуулийн хүрээнд хамгаалах, зөрчигдсөн эрхээ сэргээлгэх чадвар нэмэгдсэнээр бусдын буруутай үйл ажиллагааны улмаас учрах эдийн засгийн хохирол буурах зэрэг олон ач холбогдолтой юм.
Энэхүү ажлыг Хууль зүй, дотоод хэргийн яам, Хууль зүйн үндэсний хүрээлэн, Хэнтий аймгийн Засаг даргын Тамгын газар, Нээлттэй нийгэм Форум, Монголын хуульчдын холбоо зэрэг байгууллага хамтран хэрэгжүүлж байна.
Нээлтэд Хууль зүй, дотоод хэргийн яамны Төрийн нарийн бичгийн дарга, “Бүх нийтийн эрх зүйн боловсролын үндэсний зөвлөл”-ийн дэд дарга Г.Билгүүн, Хууль зүйн үндэсний хүрээлэнгийн захирал, “Бүх нийтийн эрх зүйн боловсролын үндэсний зөвлөл”-ийн нарийн бичгийн дарга С.Энхцэцэг, Хэнтийн аймгийн Засаг даргын Тамгын газрын дарга Ж.Ганбаатар, Монголын Хуульчдын холбооны ерөнхийлөгч, “Бүх нийтийн эрх зүйн боловсролын үндэсний зөвлөл”-ийн гишүүн Ж.Хунан, Нээлттэй нийгэм форумын зохицуулагч П.Бадамрагчаа болон бусад албаны төлөөлөл, иргэд оролцлоо.
Хууль зүйн зөвлөгөө, мэдээллийн цахим сан е-khutuch.mn цахим хуудас нь иргэдийн эрх зүйн гол эх сурвалж, цахим гарын авлага болж ашиглагдах төдийгүй, нийт иргэдийн хууль зүйн зөвлөгөө, мэдээллийг нэг дороос авах цахим хөтөч болж байгаагаараа онцлогтой юм.
